Mga empleyado sang Iloilo City Gov’t,nagreklamo nga wala nakabaton sang sweldo (May 1-May 31)

ILOILO CITY – Wala sa gihapon mabaton sang mga empleyado sang Office of the City Civil Registry sa Iloilo City Government ang ila sweldo sang bulan sang Mayo.

Sa interview sang Bombo Radyo kay Jojo Pisueňa, Registration Officer 3, iya ginpahayag nga may yara na kuntani sang payroll nga nakahanda para sa mga empleyado apang natukiban sang City Accounting Office nga nalakip ang pangalan ni Joe Mari Esteral sa payroll nga kuntani indi na ini kabahin nga mahatagan sang sweldo bangud nakabaton ini sang dismissal order sang nakaligad nga Pebrero 2020.

Bangud sini, gin-hold sang City Accounting Office ang payroll kag luyag sang opisina nga mahibaluan kun ngaa yara ang pangalan ni Esteral sa payroll.

Suno kay Pisueña, nag-obra na lang sang lain nga payroll ang Office of the City Civil Registry sa diin wala na ginlakip ang pangalan ni Esteral kag kuntani pirma na lang ni Romeo Caesar Manikan Jr. ang kulang.

Dugang sang natungdan, Hunyo 3 pa nabaton ni Manikan ang payroll apang tubtob subong wala sa gihapon ini mapirmahan.