ILOILO CITY-Nagdepensa ang pinuno sang City Civil Registry Office sa akusasyon sang mga empleyado sang nasambit nga opisina nga siya ang rason kun ngaa wala pa nila nabaton ang ila sweldo kag midyear bonus.
Sa interview sang Bombo Radyo kay Mr. Juncae Manikan, iya ginpahayag nga sala kag wala sang basehan ang alegasyon bangud sang bulan pa sang Mayo sang iya ginpirmahan ang payroll sang mga empleyado.
Suno kay Manikan, nangin pending ang payroll sa City Accounting Office apang wala gilayon nakalab-ot sa iya ihibalo kun ano ang kabangdanan kun ngaa nag-angkon sang problema pag-abot sa nasambit nga opisina.
Suno pa kay Manikan, nakapadala man ini sang sulat kay Iloilo City Accountant Michelle Lopez agud mamangkot tuhoy sa pending nga payroll sa diin ang sabat sang accountant amo nga nahambalan na niya ang payroll maker sang Civil Registry Office nga si Jean Deala kag Assistant Department head Cherry Ampig sang dapat himuon.
Dugang pa ni Manikan, kun napalab-ot lamang sa iya nanday Ampig kag Deala ang nasambit nga impormasyon gikan sa City Accountant natigayon kuntani nga mahatagan ini sang atensyon kag wala nag-angkon sang problema sa pagrelease sang sweldo.
Gintuad naman ni Manikan nga kahapon, Hunyo 8 lang sang iya nahibaluan nga ang pagkalakip ni Joe Mari Esteral sa payroll nga kuntani indi na ini kabahin nga mahatagan sang sweldo bangud nakabaton ini sang dismissal order sang nakaligad nga Pebrero 2020 ang rason sang problema.
Suno sa iya,nagdumdom siya nga wala man sang problema nga ilakip si Esteral sa payroll bangud indi pa pinal ang dismissal sini kag may pending appeal pa ini.
Sa subong,bangud sa rekomendasyon sang City Accountant, iya na ginmanduan si Esteral nga -icomply ang mga papeles nga ginapangayo agud nga mahitso na ang problema kag marelease na ang payroll sang mga empleyado.
Wala naman sang ihibalo si Manikan kun may kalain sang buot sanday Ampig kag Deala batok sa iya rason nga wala siya ginpahibalo sang rekomendasyon sang City Accounting Office.
