ILOILO CITY – Masobra na sa 2,000 ang kaso sang Dengue Hemorrhagic Fever sa Western Visayas.
Sa interview sang Bombo Radyo kay Dr. Jessie Glen Alonsabe, pinuno sang Regional Epidemiology and Surveillance Unit sang Department of Health Region 6, iya ginpahayag nga 2,196 na ang kabug-usan nga kaso sang Dengue humalin sang Enero 1 tubtub Mayo 30.
Suno kay Alonsabe, lain ang sintomas sang Dengue kun ipaanggid sa Coronavirus Disease 2019 (COVID-19) kun sa diin ang common lang amo ang pagbatyag sang hilanat.
Sa Dengue, lakip sa sintomas amo ang hilanat, rashes kag pagsuka sang dugo samtang sa COVID-19 naman amo ang hilanat kag ubo.
Sa subong, padayon ang 4S campaign sang Department of Health nga ginalakipan sang search and destroy mosquito breeding places, self-protection measures, seek early consultation kag support fogging or spraying.
Kun pahat-pahaton ang 2,196:
Antique – 110 kag isa ang patay
Capiz – 211
Guimaras – 35
Iloilo – 417
Iloilo City – 156 kag isa ang patay
Negros Occidental – 786 kag isa ang patay
Others (Pangayaw sa Region 6) – 39
