ILOILO CITY – Masobra sa 8,000 ka Locally Stranded Individuals ang may yara sang kumpleto nga papeles agud nga makapauli sa Western Visayas.
Sa interview sang Bombo Radyo kay Atty. Roy Villa, tagpamaba sang Regional Inter-Agency Task Force, iya ginpahayag nga as of June 8, naglab-ot sa 8,140 ang Locally Stranded Individuals ang may yara sang kumpleto nga papeles apang indi lang niya mapat-od kun pila na ang nakapauli.
Suno kay Atty. Villa, kalabanan sa Locally Stranded Individuals ang naghalin sa Metro Manila nga ginapasakay sa sweeper flight ukon barko.
Ginpahayag ni Atty. Villa nga ang Department of the Interior and Local Government central office ang nagapatigayon sang repatriation nga amo naman ang nagapahibalo sa task force kag sa tagsa ka Local Government Unit.
Ugaling kun kaisa suno sa natungdan, atrasado na ang pagpahibalo sang nasambit nga ahensya sang gobyerno nga may yara sang magapauli sakay sa sweeper flight rason nga indi makapreparar ang tagsa ka Local Government Unit sa pagsugat sa Locally Stranded Individual.
