ILOILO CITY – Ginaduso ni Iloilo City Mayor Jerry Treñas nga ipaidalom sa courtesy seminar ang tanan nga traffic enforcers sa syudad sang Iloilo.
Ini ang kasunod sang natabo nga pagdakop sang ginapahayag arogante nga traffic enforcer sa tanod commander bangud sa pagpameno sang ginapahayag wala ang plaka nga tricycle patrol nga may karga nga pasyente.
Sa interview sang Bombo Radyo kay Treñas, iya ginpahayag nga kun kinahanglanon gid, ipaidalom sa Good Manners and Right Conduct ang tanan nga traffic enforcers agud nga matudlu-an sang maayo nga paminatasan.
Suno kay Treñas, kinahanglan nga tun-an sang maayo antes makapaguwa sang desisyon tuhoy sa madangatan sang nasambit nga traffic enforcer.
Ginpahayag ni Treñas nga indi man niya luyag nga may madulaan sang trabaho ilabi na subong nga tuman ka pigado ang pagpangabuhi.
May kaangtanan naman sa Muller-Britanico case, ginpahayag sang alkalde nga kinahanglan nga mapabilin ang trust and confidence sang publiko sa Philippine National Police.
Sa pagpaathag sang alkalde, kun mapamatud-an nga naulamid gid man sa krimen ang duha ka mga pulis, indi man buot-silingon nga indi na masaligan ang bug-os nga organisasyon.
Sa subong, ginahulat na lang sang natungdan ang mangin resulta sang imbestigasyon nga ginapamunu-an sang National Bureau of Investigation.
