ILOILO CITY- Ginlunsar sang Museo Iloilo ang Breath of Life nga isa ka proyekto nga nagatuyo nga magbulig sa mga local artists kag mga medical frontliners sa tunga sang Coronavirus disease 2019 (Covid-19) pandemic.
Sa interview sang Bombo Radyo kay Mr. Rex Aguado sang Museo Iloilo, iya ginpahayag nga sa nasambit nga proyekto, gintipon ang tanan nga Iloilo-linked artists agud maghimo sang orihinal, collectible kag barato nga artworks nga may yara sang historical nga aspeto.
Suno kay Aguado, ang tanan nga mga obra maestra sang mga artists ang mahimo mabakal sa barato nga presyo humalin sa P5,000 pasaka sa diin mahimo man magpa-commission ang cliente.
Ang matipon nga kantidad ang igahatag sa Catholic Womens’ League sa San Jose de Placer Chapter agud ibakal sang mga groceries para sa mga frontliners kag sa iban nga Ilonggo artists.
Sa subong, amat-amat na nga nagaabot kag ginaplastar sa Museo Iloilo ang mga artworks sang mga artists.
Para sa dugang nga mga updates tuhoy sa proyekto, mahimo nga bisitahon ang facebook page nga Breath of Life.
