ILOILO CITY- Nanindugan ang mga myembro sang oposisyon nga unconstitutional ang Anti-Terrorism Bill.
Sa exclusive interview sang Bombo Radyo kay Sen. Francis ‘Kiko’ Pangilinan, presidente sang Liberal Party of the Philippines, iya ginpahayag nga maathag nga paglapas sa konstitusyon ang hagna.
Suno kay Pangilinan, ginapamatukan nila nga mga myembro sang oposisyon kaupod si Sen. Risa Hontiveros ang pagpasar sang nasambit nga hagna sa kahangawa nga mangin kaangay sang panahon sang Martial Law ang Pilipinas kun sa diin, sin-o man ang mahimo nga arestuhon kag presuhon apisar nga wala sang warrant of arrest.
Suno pa sa iya, kun mangin layi na ang Anti-Terrorism Bill, mahimo nga mapreso apisar wala sang warrant of arrest ang sin-o man nga magpalayag sang hibubun-ot batok sa gobyerno.
Nagapati naman ang senador nga sa tion nga mangin kasuguan na ini , indi mangin patas ang pagpatuman sini bangud pat-ud nga mahilway ang kaalyado sang Duterte administation.
