ILOILO CITY – Ipaidalom sa mortality review ang 11 ka mga COVID-19 patients nga nagtaliwan sa bug-os nga Western Visayas.
Ini ang kasunod sang kamatayon sang Patient no. 115 kun sa diin myocardial infarction ukon heart attack ang rason kun nga-a ginbawi-an sang kabuhi ang 39 anyos nga lalaki nga isa ka Overseas Filipino Worker sang Anilao, Iloilo.
Sa pihak sini, ginpahayag naman sang pamilya nga kasubong nga ginpabay-an ang ila himata samtang naka-admit sa Western Visayas Sanitarium.
Suno kay Dr. Marlyn Convocar, Director sang Department of Health Region 6, magasugod na sa masunod nga semana ang mortality review sa tanan nga pasyente nga ginbawi-an sang kabuhi.
Sa pagpaathag naman ni Dr. Ma. Sophia Pulmones, pinuno sang Local Health Support Division sang Department of Health Western Visayas, ang mga gina-admit sa Western Visayas Sanitarium amo ang mga asymptomatic kag ang mga may mild symptoms.
Nakadepende na sa attending physician suno kay Pulmones ang classification sang tagsa ka pasyente.
