STA. BARBARA, ILOILO – Lunsay kwalipikado nga benepisyaryo ang nakabaton sang una nga hugnat sang cash assistance sa idalom sang Social Amelioration Program sa Brgy. Inangayan, Sta. Barbara, Iloilo.
Ini ang panindugan ni Punong Barangay Ricardo Bayog sang nasambit nga lugar, kasunod sang reklamo tuhoy sa ginapahayag anomaliya sa pagpanglista sang mga makabaton sang cash assistance.
Sa interview sang Bombo Radyo kay Bayog, iya ginpahayag nga indi matuod ang mga akusasyon nga nalakip sa mga benepisyaryo ang mga may yara sang regular nga trabaho.
Sa pagkamatuod suno kay Bayog, tanan nga pumuluyo ang ginhatagan kag ginpapasa sang form apang santo sa validation sang Department of Social Welfare and Development, ang iban nga nalakip sa listahan ang indi kwalipikado kasubong sang ginareklamo nga retired army.
May kaangtanan naman sa ginapahayag manunudlo nga nakabaton sang ayuda, ginpahayag ni Bayog nga single mother kag indi lisensyado nga manunudlo ang ginareklamo.
Indi man matuod suno kay Bayog nga may Overseas Filipino Worker nga nakabaton sang ayuda bangud nga ang ginatumod sang mga tagreklamo ang anay OFW apang sa subong, nagatrabaho na sa Metro Manila kag isa sa mga nadulaan sang trabaho bangud sa COVID-19.
Bisan isa-isahon pa suno sa natungdan ang background sang mga benepisyaryo, makit-an nga tanan sila ang mga pigado kag kwalipikado sa pagbaton sang nasambit nga bulig.
