ILOILO CITY – Ginkalipay ni Msgr. Meliton Oso, Director sang Jaro Archdiocesan Social Action Center, nga may pila na ka mga deboto nga nagtambong sa misa nga ginpatigayon sa Jaro Metropolitan Cathedral.
Ini matapos nga nag-umpisa na sa pagbukas ang Simbahang Katolika sa pagbaton sang mga deboto ilabi na sa misa apang kinahanglan sa gihapon ang sundon ang minimum health protocol.
Ang tanan nga mga deboto nga nagtambong sa misa ang nagsuksok sang facemask kag istrikto nga ginpatuman ang physical distancing.
Ginpahayag ni Msgr. Oso nga kun tani, magpadayon na ang kasubong nga set-up bangud indi man malikawan nga may mga indi kuntento nga sa live streaming lang magpamati sang misa.
Apisar nga gamay lamang ang mga deboto nga nagtambong sa misa, ginpahayag ni Msgr. Oso nga nabatyagan gid sang tanan ang presensysa ni Hesus.
Kun tani suno sa natungdan, mangin palaagyan man ang tagsa-tagsa agud nga makabulig ilabi na sa mga nagabatyag sang mental health problem bangud daku ang mabulig sang moral kag spiritual support sa pang ino-ino sang isa ka tawo.
