ILOILO CITY – Tatlo ka adlaw nga nag check-in sa hotel ang personnel sang Bureau of Fire Protection Region 6 nga nagpositibo sang Coronavirus Disease 2019 (COVID-19) apang nag check-out nga wala nakapakig-angot sa City Health Office.
Ini ang nabaton nga impormasyon ni Dr. Marie Jocelyn Te, Medical Coordinator sang Emerging and Re-emerging Infectious Diseases sang Department of Health 6, kun sa diin Hunyo 5 sang nag-abot sa syudad sang Iloilo ang nasambit nga personnel nga taga Cebu.
Suno kay Dr. Te, gilayon nga ginpaidalom sa Rapid Test kag Swab Test ang nasambit nga personnel kag sang nagnegatibo sa Rapid Test, mas ginpili niya nga magtinir sa isa ka hotel umpisa Hunyo 6.
Makaligad ang tatlo ka adlaw, ginapahayag nga ginsugat ang nasambit nga personnel sang iya man lang kaupod sa trabaho kag temporaryo nga ginpatinir sa ila quarters tubtub nagguwa ang resulta sang Swab Test.
Ang nasambit nga personnel suno kay Dr. Te ang nagatinir na sa subong sa isa ka isolation facility.
May kaangtanan diri, gin-athag naman ni Fire Insp. Mary Angielie Bolocon, tagpamaba sang Bureau of Fire Protection 6, nga wala naka-duty ang nasambit nga personnel.
Maluwas diri, gin-athag man ni Bolocon nga indi man matuod ang impormasyon nga nakapanglugayawan pa ang nasambit nga personnel rason nga madamo ang naka-angkon sang close contact.
Sa pagkamatuod suno kay Bolocon, wala nakaguwa sa quarters ang nasambit nga personnel bangud nga wala pa natapos ang quarantine kag mismo ang Department of Health ang nagpakig-angot sa ila tuhoy sa positibo nga Swab Test result.
Ang naka-angkon lang sang close contact sa nasambit nga personnel amo ang nagadul-ong sang pagkaon kag ang nagsugat sa hotel.
Sa subong, ginpahayag sang natungdan nga padayon na ang contact tracing sang Department of Health 6 samtang nakadepende naman sa Regional Director kun ano nga disciplinary action ang igahatag sa nasambit nga personnel kun mapamatud-an nga naglapas sa quarantine procedure.
