ILOILO CITY – Magapangatubang sang mabug-at nga silot ang personnel sang Bureau of Fire Protection nga nagpositibo sa Coronavirus Disease 2019 (COVID-19) sa tion nga mapamatud-an nga naglapas sa quarantine protocol.
Sa interview sang Bombo Radyo kay Iloilo City Mayor Jerry Trenas, iya ginpahayag nga may impormasyon nga nagpadulong pa sa Boracay ang nasambit nga personnel agud magtambong sa isa ka party kaupod ang 28 ka iban pa.
Suno kay Treñas, kun makumpirma ang nasambit nga report, tuman ka daku ang mangin problema ilabi na sa pagpatigayon sang contact tracing.
Indi lamang ang mga personnel sang nasambit nga ahensya ang ipaidalom sa strict quarantine kundi ang mga naka-angkon pa gid sang close contact kasubong sang ila pamilya.
Ang nasambit nga aktu suno sa alkalde ang makabig nga paglapas sa Bayanihan to Heal as One Act.
Samtang, makaduha ka beses nga nagpakig-angot ang City Health Office sa Bureau of Fire Protection Region 6 matapos nabaton ang impormasyon nga may nagpositibo nga personnel.
Sa interview sang Bombo Radyo kay Public Safety and Transportation Management Office head Jeck Conlu, iya ginpahayag nga humalin sang hapon tubtub mag-gabi, ila nga ginpakig-angutan kag ginbalikan ang Bureau of Fire Protection Region 6 apang wala gid sila sang may nakuha nga impormasyon kun sa diin nagatinir ang COVID-19 patient.
Suno kay Conlu, palamangkutanon kun nga-a ginpanginwala sang Bureau of Fire Protection Region 6 nga yara sa quarters nagatinir ang nasambit nga personnel.
Ginpahayag ni Conlu nga mga pasado na 9:00 sa gab-i sang amo nga adlaw sang ila nakuha ang nasambit nga personnel agud dal-on sa isa ka hospital facility.
May mga impormasyon man nga nagpanglugayawan pa ang nasambit nga personnel apang ginpahayag sang natungdan nga indi niya makumpirma ang tuhoy diri.
Kadungan sini, gin-athag sang natungdan nga wala nagpahibalo sa City Health Office ukon sa COVID-19 team ang nasambit nga personnel kadungan sang iya nga bagbiya sa hotel nga gintiniran.
