TUBUNGAN, ILOILO– Wala na nakabato kag nakapangaman ang pulis nga ginpatay sang mga armado nga lalaki nga nagpakilala myembro sang rebelde nga New People’s Army sa Barangay Teniente Benito, Tubungan, Iloilo.
Ang biktima amo si Master Sergeant Arnel Paurillo, 42-anyos, residente sang Bongol San Vicente, Guimbal kag assigned sa Provincial Drug Enforcement Unit.
Sa interview sang Bombo Radyo kay alyas Poldo, tag- iya sang balay sa diin natabo ang pagpatay, iya ginpahayag nga nagatipon sila sa lamesa kag nagainom-inom upod ang pulis nga naglagaw lang sa lugar sang hinali lang nagsulod paagi sa pwertahan sa kusina ang mga suspek sa diin ginpahapa ang tanan nga tawo sa sulod sang balay kag didto na ginpaarakan sang luthang ang biktima.
Suno kay alyas Poldo, madasig nga natabo ang tanan rason nga wala na makadepensa kag makalikaw ang pulis nga sang amo nga tion, wala nakataklos sa iya lawas ang iya service firearm.
Ginpahayag naman niya nga matapos ang insidente, ginsakyan pa sang mga suspek ang duha ka mga motorsiklo nga ginapanag-iyahan sang isa ka manunudlo sa lugar.
Samtang, ginkumpirma naman sang mga solterito nga natabuan nga nagahampang sang basketball sa gwa sang balay sang natabo ang pagpatay sa biktima nga nagpakilala sa ila ang mga suspek nga mga myembro sang rebelde nga New People’s Army.
Samtang, wala naman sang may nakakita sang itsura sang mga suspek bangud nga may tabon sa guya ang mga ini.
Nahibaluan nga 17 ka igo sang bala ang naangkon sang biktima nga gintunaan sang iya gilayon nga kamatayon.
