ILOILO – Ginkumpirma sang Police Regional Office 6 nga yara sa ‘hitlist’ sang New People’s Army ang pulis nga ginpatay sa Brgy. Teniente Benito, Tubungan, Iloilo.
Ang biktima amo si PSSg. Arnel Paurillo nga ginpaarakan luthang sang rebelde nga grupo kagab-i.
Sa interview sang Bombo Radyo kay PLt. Col. Gilbert Gorero, tagpamaba sang Police Regional Office 6, iya ginpahayag nga may yara kuntani sang operasyon nga patugayunon subong nga adlaw sa banwa sang Tubungan sa diin kaupod diri si Paurillo.
Si PSSg. Paurillo amo ang nagaserbe sang warrant of arrest sa mga ginakilala nga katapo sang New People’s Army kag intel man ini ukon myembro sang Provincial Drug Enforcement Unit.
Suno kay Gorero, ginakondenar gid sang Police Regional Office 6 kag Iloilo Police Provincial Office ang pagluthang patay sang rebelde nga grupo sa katapo sang Philippine National Police.
Nagapalab-ot man sang pagpakig-unong ang PRO-6 sa pamilya sang pulis.
Nahibaluan nga 17 tanan ka igo sang bala ang naangkon ni PSSg. Paurillo nga gintunaan sang iya kamatayon.
