ILOILO – Family members ang kalabanan nga naka-angkon sang close contact sa duha ka mga pasyente nga nagdugang sa listahan sang mga nagpositibo sa Coronavirus Disease 2019 (COVID-19) sa Western Visayas.
Sa bahin Igabaras, Iloilo, ginpahayag ni Mayor James Esmeralda nga ang Patient no. 148 nga isa ka 30 anyos nga lalaki ang naka-angkon sang close contact sa una nga COVID-19 patient sa nasambit nga banwa.
Suno kay Esmeralda, naka-angkon sang close contact ang duha ka mga pasyente kadungan sang pagtagtaganay sang Social Amelioration Program.
Ginpahayag ni Esmeralda nga si Patient no. 148 ang isa ka empleyado sang Department of Social Welfare and Development Region 6 kag pinaka-ulihi nga nagbalik sa syudad sang Iloilo sang Mayo 31.
Sang Hunyo 1 suno kay Esmeralda, nag-abot ang Swab Test result sang Patient no. 114 – 55 anyos nga lalaki nga isa ka municipal councilor kag subong nga adlaw, Hunyo 16, lang sang nakumpirma nga positibo ang DSWD employee.
Sa pinaka-latest nga data, kapin sa 20 na ang nalakip sa contact tracing sa banwa sang Igbaras.
Sa bahin naman sang Lambunao, Iloilo kun sa diin nagpositibo sa COVID-19 si Patient no. 151 – 22 anyos nga lalaki kag isa ka pulis, ginpahayag ni Mayor Reynor Gonzales nga sang nagligad nga Hunyo 11 lang nakapa-uli sa ila balay ang nasambit nga pasyente.
Gin-athag ni Gonzales nga wala nagdugay sa ila balay ang nasambit nga pasyente kag gilayon man nga nagbalik sa syudad sang Iloilo agud magtrabaho.
Kasubong sa Igbaras, lunsay mga himata lamang ang naka-angkon sang close contact sa 22 anyos nga pasyente.
