ILOILO CITY – Hulaton ni Iloilo City Mayor Jerry Treñas ang investigation report sang Iloilo City Police Office antes magpasa sang complaint letter sa Inter-Agency Task Force batok sa Bureau of Fire Protection Region 6.
Sa interview sang Bombo Radyo kay Treñas, iya ginpahayag nga miyembro sang COVID-19 sa syudad sang Iloilo si Iloilo City Police Office Director Police Col. Eric Dampal nga amo ang magapasa sang report tuhoy sa natabo pagpanglugayawan sa Boracay sang BFP personnel nga nagpositibo sa Coronavirus Disease 2019 (COVID-19).
Suno kay Treñas, ang kaundan sang report ang importante sa pagbalay niya sang reklamo batok sa nasambit nga personnel kaupod ang 29 ka iban pa lakip na ang ila Regional Director.
Ginpahayag ni Treñas nga tuman ka damo ang posible naka-angkon sang close contact rason nga padayon na ang contact tracing agud nga mapaidalom sila sa quarantine.
Pagadesisyunan sang COVID-19 team kun sanday sin-o ang magatinir sa hotel kag sa Diamond Jubilee Hall para sa 14-day mandatory quarantine kasunod sang ginpatigayon nga Swab Test.
Matandaan nga ginkumpirma ni Malay, Aklan Mayor Frolibar Bautista nga nagpadulong sa Boracay ang mga personnel sang nasambit nga ahensya kun sa diin nakahanda siya nga magpasaka sang kaso kun mapamatud-an nga may yara sang paglapas sa quarantine protocol.
