ILOILO CITY- Kanselado sa gihapon ang byahe sang mga fastcrafts nga may ruta nga Iloilo City- Bacolod City and vice versa.
Sa interview sang Bombo Radyo kay Rowel Gresos, boat captain sang Weesam Express, iya ginpahayag nga nagalaum sila nga mabalik na ang byahe sa pinakamadali nga tion bangud nga apektado ang ila sweldo sa diin delayed ini sa sulod sang halos duha na ka bulan.
Apang suno kay Gresos, apisar makabalik na sila sa pagbyahe, mangin dako nga problema ang tuman ka gamay nga numero sang pasahero nga tugutan nga magsakay nga limitahan lang sa 60 apisar nga 296 ang seating capacity sang ila barko.
Suno pa sa kapitan, dako nga kapierdahan ang ila maagom ilabi na nga wala man sang abiso tuhoy sa pagpasaka sang pletehan.
Sa pihak sini, ginpat-ud-niya nga preparado ang mga fastcraft sa pagpatuman sang minimum health protocols kag standards sa diin naplastar na ang mga pulungkuan para sa pagpatigayon sang physical distancing sa mga pasahero.
