ILOILO CITY- Wala pa natapos sang Department of Social Welfare and Development Region 6 ang pag-finalize sang payment arrangement para sa second tranche sang ayuda sa idalom sang Social Amelioration Program.
Sa interview sang Bombo Radyo kay Mae Castillo, spokesperson sang nasambit nga ahensiya, iya ginpahayag nga ginahitso nga mangin digital na ang paghatag sang nasambit nga P6,000 nga ayuda sa diin ipaagi nalang ini sa bangko,remittance centers ukon pera padala.
Apang sa mga malayo nga mga lugar, patigayunon sa gihapon ang door to door nga pay-out sa bulig sang mga katapo sang Armed Forces of the Philippines.
Suno kay Castillo, diri sa Western Visayas, ang nalakip lang sa makabaton sang second tranche sang ayuda amo lang ang Syudad kag Probinsya sang Iloilo kag Bacolod City.
Ginpahayag naman niya nga may batunon sa gihapon ang kwalipikado nga benepisyaryo gikan sa iban nga probinsya nga wala nahatagan sang ayuda sa una nga tranche.
Dugang niya,ang ang mga kwalipikado nga pamilya sa Syudad kag Probinsya sang Iloilo kag Bacolod City nga wala nakabaton sa una nga tranche ang makabaton subong sang P12,000 sa second tranche sa kondisyon nga wala sang findings nga indi sila eligible nga makabaton sang ayuda ukon wala sang myembro sang pamilya nga nakabaton sang ayuda gikan sa iban nga ahensya.
Target naman nga matapos ang paghatag sang ayuda sa Hunyo 24, Mierkules.
