ILOILO CITY – Nabaton na ni Iloilo City Mayor Jerry Treñas ang initial investigation sang Iloilo City Police Office may kaangtanan sa kontrobersiya nga ginakaulamiran sang mga personnel sang Bureau of Fire Protection Region 6.
Sa interview sang Bombo Radyo kay Treñas, iya ginpahayag nga mismo si Iloilo City Police Office Director Police Col. Eric Dampal ang nagpasa sang report sa iya.
Suno kay Treñas, ginpasa na niya ang report sa City Legal Office agud nga makadugang sa imbestigasyon kag sa posible kaso nga ipasaka batok sa mga naulamid nga personnel.
May kaangtanan naman sa pila ka empleyado sang Iloilo City Government nga nagpanglugayawan sa Anini-y, Antique kun sa diin nagpadulong ang mga BFP personnel, ginpahayag ni Treñas nga nakapasa na sang report si City Zoning Administrator Atty. Ruben Torres.
Kadungan sini, ginpahayag sang alkalde nga indi pa siya makadesisyon kun bala palawigon ukon indi ang lockdown nga ginapatuman sa bug-os nga talatapan sang Bureau of Fire Protection Region 6 nga magatapos na kun tani buwas nga adlaw, Hunyo 19.
Sa pagpaathag sang alkalde, ginahulat pa niya ang resulta sang COVID-19 test sang 28 ka mga personnel sang nasambit nga ahensya.
Kadungan sini, ginkumpirma sang alkalde nga may isa ka opisyal sang Philippine National Police nga nagpositibo sa COVID-19.
Ang nasambit nga pulis suno sa natungdan ang indi organic personnel sang Iloilo City Police Office kag sa baylo, nag-abot sa syudad sang Iloilo bangud sa rotation of assignment.
Sa subong, ginpahayag sang alkalde nga asymptomatic ang nasambit nga police official nga naghalin sa Pangasinan.
