ILOILO – Naglab-ot sa 28 ka suicide incidents sa probinsya sang Iloilo ang na record sang Iloilo Police Provincial Office humalin Enero tubtub Hunyo 17, 2020.
Sa interview sang Bombo Radyo kay Police Master Sergeant Francisco Lindero, tagpamaba sang Iloilo Police Provincial Office, iya ginpahayag nga kalabanan sa mga naghikog amo ang yara sa edad nga 30-39 anyos nga may siyam ka kaso, ginasundan sang 11-19 anyos nga may 5 ka kaso kag may yara man sang duha ka 10 anyos nga naghikog.
Suno kay Lindero, pagbitay gamit ang lubid ukon higot kag pagluthang sa kaugalingon ang nagapanguna nga sahi sang paghikog tuga sang depresyon.
Ginpahayag ni Lindero nga may yara na sang core group nga gintukod ang Iloilo Police Provincial Office agud makabulig sa mga nagakinahanglan sang bulig sa mental health.
Sa 28 suno sa natungdan, wala pa diri nadala ang 49 anyos nga iloy sa Balasan nga nasapwan na gid lamang sang iya anak nga nagabitay gamit ang elastic bandage.
Suno naman sa Provincial Social Welfare Office, ang ginapatuman nga lockdown ang nakatuga man sang depresyon ilabi na sa mga kabataan kag mga nadulaan sang trabaho.
Sa pagpaathag ni Dr. Neneth Pador, pinuno sang Provincial Social Welfare Office, ang ginpatuman nga lockdown ang may yara sang negatibo nga epekto sa mental health kag ang halimbawa diri amo ang paghikog sang isa ka bata bangud nga indi na siya makapanglugayawan bangud sa lockdown.
Magluwas diri, ang depresyon suno kay Pador ang tuga man sang nagkalain-lain nga rason kasubong sang family problem kag balati-an.
Bangud sini, nagtukod sang programa nga ‘Psychosocial Response for Ilonggos Towards More Resilient Mind and Emotions’ ang Iloilo Provincial Government agud tutukan ang psychosocial needs sang mga Ilonggo.
Tatlo ka pamaagi ang ginapanugyan sang Simbahang Katolika agud nga malikawan ang suicide.
Sa pagpaathag ni Msgr. Meliton Oso, director sang Jaro Archdiocesan Social Action Center, una sa listahan amo ang self appreciation ukon ang paghatag sang importansya sa kaugalingon, ika duha amo ang pagpalangga kag pag-ulikid sa pamilya ukon himata kag ang ika tatlo amo ang pagpangamuyo sa Ginuo.
Suno kay Msgr. Oso, isa man sa mga rason sang suicide amo ang social media apang nakadepende man ini sa paggamit.
Para sa mga may yara sang problema, indi magkahuya sa pagpautwas sa himata, suod nga abyan ukon kakilala agud nga magmag-an ang ginabatyag.
Ginpahayag sang natungdan nga wala sang malain sa pagbatyag sang problema apang nagakadapat nga indi ini magresulta sa pag-utas sang kabuhi.
