ILOILO – Ginpa-idalom sa 14-day quarantine ang tatlo ka mga gwardya sang Iloilo Provincial Capitol bangud may yara ini sang exposure sa isa ka persona nga nagpositibo sa Coronavirus Disease 2019 (COVID-19).

Suno kay Atty. Suzette Mamon, nagpadulong ang amo nga COVID-19 positive sa Iloilo Provincial Capitol agud kuntani nga mamangkot kun paano magpaidalom sa Real Time Reverse Transcription Polymerase Chain Reaction (RT-PCR) test bangud nagpositibo ang iya resulta sa ginpatigayon nga rapid testing.

Apang wala pa ini nakasulod sa Kapitolyo, ginpamangkot siya sang mga gwardya kun sa diin ini mapadulong kag kun diin bala ini halin bangud kinahanglan pa niya nga mag sulat sa log book.

Bangud nahibaluan nga halin sa Cebu ang amo nga pasyente, wala siya natigayon nga makasulod sa kapitolyo kag makasulat sa amo nga log book bangud ginakonsidera ang Cebu nga yara pa sa high risk area.

Sang natigayon ang pagpa-idalom sa RT-PCR test sang amo nga pasyente, natukiban nga magluwas sa rapid test, nagpositibo man ini sa confirmatory test.