ILOILO – Naglab-ot sa 151 ang na record nga focus crimes umpisa sang ginpatuman ang community quarantine sa probinsya sang Iloilo.
Kadungan sang pagsinapol sang Iloilo Police Provincial Office kaupod si Gov. Arthur Defensor Jr., ginplastar ni Police Lt. Col. Bonifacio Ancajas Jr., Deputy Provincial Director for Operations, ang nanari-sari nga focus crimes nga natabo kasubong sang murder, homicide, physical injuries, rape, robbery, theft kag motornapping.
Sang ginpatuman ang Enhanced Community Quarantine, 12 ang murder, 5 ang homicide, 34 ang physical injuries, 10 ang rape, 3 ang robbery, 4 ang theft kag 1 ang motornapping.
Sang General Community Quarantine, 7 ang murder, 3 ang homicide, 17 ang physical injuries, 9 ang rape kag 3 ang robbery samtang sang Modified General Community Quarantine naman, 8 ang murder, 29 ang physical injuries, 2 ang rape, 2 ang robbery kag 2 man ang motornapping.
Kadungan sini, ginplastar man ni Ancajas ang accomplishment sang Iloilo Police Provincial Office sa illegal gambling kun sa diin humalin Enero 1 tubtub Mayo 31, naglab-ot sa 398 ang nadakpan, 67 ang napasaka nga kaso kag P159,357 naman ang balor nga nakumpiska.
Kun tuhoy naman sa wanted persons, naglab-ot sa 45 ang nadakpan nga most wanted samtang 231 naman sa kategorya nga other wanted.
Sa illegal drugs, naglab-ot sa 65 ang drug personalities nga nadakpan, 80 ka kaso ang napasaka kag 638.917 grams sang illegal drugs ang nakumpiska sa kasubong man nga period.
As of June 18, naglab-ot na sa 29 ang na record nga suicide incidents sa bug-os nga probinsya.
Kadungan sini, ginpasalamatan man sang natungdan si Gov. Defensor bangud sa paghimo kay Police Col. Paul Kenneth Lucas bilang full-fledged director sang Iloilo Police Provincial Office.
