ILOILO CITY – Nagtuga sang kakugmat ang pagpositibo sa rapid test sang isa ka returning resident sang Brgy. Ingore, La Paz, Iloilo City.
Sa interview sang Bombo Radyo kay Punong Barangay Jonathan Jalandoni sang nasambit nga lugar, iya ginpahayag nga ang nasambit nga residente nga ginhinago sa pangalan nga alyas Junjun ang nakabakal lamang sang propedad sa Brgy. Ingore.
Suno kay Jalandoni, si Junjun ang ginapahayag residente sang Brgy. Mansaya apang nakapangasawa sa Bo. Obrero, Lapuz antes nakasaylo sa ila barangay.
Ginpahayag ni Jalandoni nga sang Hunyo 18 lang niya nahibalu-an nga isa na ka semana nga nakapauli sa Brgy. Ingore si Junjun halin sa Metro Manila.
Wala lang nahibalu-an sang Punong Barangay kun paano nakapauli si Junjun bangud nga ang ginapahanugutan lamang subong nga makasakay sa eroplano kag barko amo ang mga Locally Stranded Individuals ukon repatriated Overseas Filipino Workers.
Sang Hunyo 18, ginpahayag sang natungdan nga gilayon niya nga ginpadul-ong sa Iloilo Diamond Jubilee Hall ang nasambit nga residente kaupod ang mga barangay kagawad kag barangay tanod para sa COVID-19 test.
Nauna nga nagguwa ang positibo nga resulta sang Rapid Test kag ginahulat pa sa subong ang resulta sang confirmatory test paagi sa RT-PCR test.
Padayon naman ang contact tracing bangud ginapahayag nga madamo ang naka close contact sa nasambit nga residente.
