MIAGAO, ILOILO – Gin-athag ni Mayor Macario Napulan nga wala sang may naka-close contact sa Locally Stranded Individual nga nagpositibo sa Coronavirus Disease 2019 (COVID-19) nga nagpauli sa Miagao, Iloilo.
Sa interview sang Bombo Radyo kay Napulan, iya ginpahayag nga si Patient no. 164 nga isa ka 25 anyos nga lalaki ang nakapauli paagi sa Balik Probinsya Program sang gobyerno.
Suno kay Napulan, nagpadulong sa Metro Manila ang nasambit nga lalaki agud kun tani magproseso sang papeles sa pagbalik sa trabaho ugaling lang, naabutan sang lockdown.
Ginpahayag ni Napulan nga Hunyo 9 sang nakapauli sa Iloilo ang nasambit nga lalaki kag sang Hunyo 10 naman ginkuhaan sang swab sample para sa COVID-19 test.
Hunyo 18 na suno sa alkalde sang nakumpirma nga positibo sa COVID-19 ang nasambit nga pasyente.
Sa pihak sini, ginpahayag sang natungdan nga wala sang dapat kabalak-an ang mga pumuluyo sang Miagao bangud nga sa pag-abot sa Iloilo sang nasambit nga lalaki sakay sa barko, ginsugat ini sang ambulansya kag gindala sa quarantine facility.
