ILOILO CITY – Nagapabilin sa Iloilo Fort San Pedro ang barko sang Cokaliong sakay ang mga pasahero halin sa Cebu.
Sa interview sang Bombo Radyo kay Ramy Pormilda, isa sa mga pasahero nga mapauli na kuntani sa banwa sang Bingawan, iya ginpahayag nga manaog na sila kuntani sang nag dungka ang barko sa Fort San Pedro apang gin-anunsyar sang Philippine Coast Guard nga i-hold anay ang mga pasahero ukon indi pagpa-panaugon.
Suno kay Pormilda, wala man siya nakahibalo kun ngaa indi pa sila pagpa-panaugon sa barko bangud kompleto man ang dala nila nga mga papeles.
May mga impormasyon man siya nga nabaton nga mahimo pabalikon ang barko sa Cebu apang indi pa niya mapat-od kun bala matuod ini.
Pahayag niya, nakapakig-angot naman siya sa Local Government Unit sang Bingawan kag handa naman kuntani ini nga magsugat sa iya.
Dugang sang natungdan, masobra 100 nga mga pasahero ang sakay sang barko.
Nahibaluan nga may yara sang mandu si Department of the Interior and Local Government Sec. Eduardo Año nga temporaryo indi pag batunon ang mga locally stranded individuals nga halin sa Cebu bangud ginakabig pa nga “high risk area” ang lugar.
