ILOILO CITY- Nagpatigayon sang labing-una nga flag raising ceremony ang Iloilo City Hall matapos ang tatlo ka bulan nga ginpaidalom sa quarantine ang Syudad sang Iloilo bangud sa Coronavirus disease 2019 pandemic.
Sa mensahe ni Iloilo City Mayor Jerry Treñas, iya ginpahayag nga ginpilit gid niya ang pagpatigayon sang flag raising ceremony bilang simbolo sang panibag-o nga panugod kag pagbalik sa normal nga pagsinalayo sa bilog nga Syudad sang Iloilo.
Suno kay Treñas, tatlo ka bulan nga wala sang kwarta nga nagsulod sa kaban sang syudad bangud patay ang negosyo kag tion na agud nga buhion ang ekonomiya.
Sa pihak sini, gin-ako sang alkalde nga mangin mabudlay ini nga proseso apang positibo siya para sa bag-o nga panugod.
Nagapati man ang natungdan nga masarangan sang pumuluyo sang syudad nga malampuwasan ang pagpanghangkat kag makontrol ang virus kun magsunod lamang sa ginapatuman nga mga protocol.
