ILOILO CITY- Ginbaton sang Iloilo City Government ang 10 ka mga Ilonggo nga kabahin sang masobra sa 50 ka pasahero sang Cokaliong gikan sa Cebu nga nagdungka sa Fort San Pedro apang wala ginpahanugutan sang Philippine Coast Guard nga magpanaug.
Sa interview sang Bombo Radyo kay Iloilo City Mayor Jerry Treñas, iya ginpahayag nga ini na ang ulihi nga Local Stranded Individuals gikan sa Cebu nga batunon sang syudad.
Suno kay Treñas, gilayon nga gindala sa Diamond Jubille Hall agud ipaidalom sa mandatory quarantine kag Real-Time Reverse Transcription Polymerase Chain Reaction (RT-PCR) test agud mahibaluan kun positibo sa virus.
Nagpasalig man ang alkalde nga masarangan sang syudad nga atipanun ang nasambit nga mga indibidwal.
Matandaan nga ginmando sang Department of the Interior and Local Government nga untaton ang pagbaton sang mga Locally Stranded Individuals gikan sa Cebu bangud ginakabig ini nga high risk area kasunod sang liwat nga pagtaas sang kaso sang covid-19 sa nasambit nga probinsya.
Apang, ginkumpirma naman ni Coastguard Commander Joe Luviz Mercurio sang Philippine CoastGuard Iloilo Station nga ginpapanaug na ang tanan nga mga pasahero sang nasambit nga barko matapos nagpagwa sang bag-o nga memorandum ang Department of the Interior and Local Government.
Suno kay Mercurio, gilayon man nga ginpangsugat ang nasambit nga mga pasahero kag gindala sa mga quarantine facility sa ila tagsa ka banwa.
Nahibaluan nga sa 54 ka mga pasahero,44 ang taga-Probinsya sang Iloilo.
