ILOILO CITY – Deserving nga maka-angkon sang low morale ang mga personnel sang Bureau of Fire Protection nga naglapas sa quarantine protocol.
Ini ang pahayag ni Iloilo City Mayor Jerry Treñas may kaangtanan sa kontrobersiya nga ginakaulamiran sang nasambit nga ahensya.
Wala man direkta nga gintumod sang alkalde apang maathag nga ang iya ginapabati-batian amo ang 28 ka BFP personnel nga nagpanglugayawan sa Boracay Island kag sa probinsya sang Antique apisar nga may isa ka personnel nga nagpositibo sa COVID-19.
Sa pihak sini, nagalaum naman ang natungdan nga paagi sa bag-o nga Regional Director sa pagkatawo ni Fire Senior Supt. Jerry Candido, liwat nga maka-angkon sang high morale ang mga bombero.
Nag-abot na sa syudad sang Iloilo ang bag-o nga Director sang Bureau of Fire Protection Region 6 nga si Fire Senior Supt. Jerry Candido.
Sa interview sang Bombo Radyo kay Candido, iya ginpahayag nga nagatinir siya sa subong sa isa ka quarantine facility matapos nakuhaan sang Rapid kag Swab sample para sa COVID-19.
Sa masunod nga inadlaw suno kay Candido, lauman na ang pag-abot sang investigating team gikan sa national headquarters agud magpatigayon sang imbestigasyon apang wala na siya naghatag sang dugang nga detalye bangud sa confidentiality.
Nag-umpisa naman ang operasyon sang Bureau of Fire Protection Region 6 kun sa diin ginamandu-an nga magbalik sa trabaho ang mga personnel nga nagnegatibo sa COVID-19, nakapaidalom sa quarantine kag ang mga wala sang exposure sa COVID-19 patient.
May kaangtanan sa kontrobersiya, ginpahayag ni Candido nga indi mahinago nga low morale sa subong ang mga bombero apang nagalaum ang natungdan nga amat-amat ini nga madula.
Bangud nga kulang sa personnel ang ahensya, ginpahayag ni Candido nga tubtub sa Hulyo 12, mahimo nga magpasa sang requirements ang mga interesado para sa posisyon nga Fire Officer 1.
Para sa dugang nga kasayuran, mahimo lang magpakig-angot sa tagsa ka local fire station apang lakip sa basic requirements amo nga dapat naga-edad sang 21-30 anyos, nakatapos sang 4-year course, professional eligibility holder kag may kataason nga atleast 5’4″ para sa mga lalaki samtang atleast 5’2″ naman sa mga babayi.
