ILOILO CITY – Temporaryo nga ginadumili-an ang pagpaligo sa baybay nga sakop sang Brgy. Ingore, La Paz, Iloilo City.
Ini matapos nga nagpositibo sa Rapid test ang isa ka residente sang nasambit nga lugar nga naghalin sa Metro Manila kag nag-agi sa Caticlan antes nagderetso sa syudad sang Iloilo.
Sa interview sang Bombo Radyo kay Punong Barangay Jonathan Jalandoni, iya ginpahayag nga ginahulat pa ang resulta sang confirmatory test sang nasambit nga residente.
Suno kay Jalandoni, ginapahayag nga nakapanglugayawan kag nakahampang pa sang basketball ang nasambit nga residente rason nga madamo ang naka-angkon sang close contact.
Ginpahayag ni Jalandoni nga isa na ka semana nga nakapauli sa Brgy. Ingore ang nasambit nga residente antes nabalahuba nga naghalin siya sa Metro Manila.
Bangud sini, gilayon nga gindala sa Diamond Jubilee Hall ang nasambit nga residente agud ipaidalom sa Rapid test kag nagguwa nga positibo sa COVID-19.
Apisar sini, nagalaum ang natungdan nga magnegatibo lamang ang resulta sang confirmatory test agud nga masigurado nga hilway man sa virus ang tanan nga naka-angkon sang close contact.
