TUBUNGAN, ILOILO – Pito ka mga myembro sang New People’s Army ang pasakaan sang kaso sang Tubungan Municipal Police Station bangud sa pagpatay sa pulis sa Brgy. Teniente Benito sa nasambit nga banwa.
Ang biktima amo si Police Master Sgt. Arnel Paurillo, 42 anyos.
Sa interview sang Bombo Radyo kay PLt. Jose Rommel Samson, hepe sang Tubungan Municipal Police Station, iya ginpahayag nga lunsay mga lalaki tanan ang myembro sang rebelde nga grupo ang pasakaan sang kaso subong nga semana.
Resulta na lang sang autopsy ang ginahulat sang Tubungan PNP agud mapasaka na ang kaso.
Samtang sa bahin naman sang pagkapatay nanday Glenn Bunda, 24 anyos, Sangguniang Kabataan chairman sang Brgy. Tagpuan kag Harold Tablazon, 33 anyos, Barangay Kagawad sang Brgy. Ago sa nasambit nga banwa, ang ginasundan nga anggulo subong sang kapulisan amo ang pahayag sang Philippine Army nga anay myembro sang rebelde nga grupo si Tablazon.
Suno kay Samson, may posibilidad nga na-ulamid lang ang SK Chairman.
Sa pihak sang asud-asud nga pagpangluthang-patay nga nagakatabo sa Tubungan, ginasiguro sang hepe nga safe sa gihapon ang banwa.
