ILOILO CITY – Nakapauli na sa Iloilo ang 402 ka Locally Stranded Individual nga naghalin sa Metro Manila.
Kaina sang hapon, Hunyo 23, sang nagdungka sa syudad sang Iloilo ang BRP Davao Del Sur nga iya sang Philippine Navy.
May kaangtanan diri, ginpahayag ni Iloilo City Mayor Jerry Treñas nga may yara sang proper coordination antes pa man ang repatriation kun sa diin 40 sa 402 ang residente sang syudad sang Iloilo.
Sa exclusive interview sang Bombo Radyo kay Abraham Agustin, isa sa mga Locally Stranded Individual nga tumandok sang syudad sang Iloilo, iya ginpahayag nga masobra siya sa apat ka bulan nga nagtinir sa Metro Manila.
Suno kay Agustin, nagbisita siya sa iya himata sa Quezon City apang naabutan sang lockdown kag nakapauli paagi sa Hatid Pag-asa Program sang gobyerno.
Ginpahayag ni Agustin nga sa Metro Manila pa lang, nagnegatibo na siya sa Rapid test kag pag-abot naman sa syudad sang Iloilo, liwat nga ginpaidalom sa rapid test kag ginkuhaan pa gid sang swab sample para sa confirmatory test.
Ang mga magnegatibo sa Rapid test ang mahimo na nga makapauli apang ang mga magpositibo naman ang pagadal-on sa quarantine facility.
