Nakakita sang probable cause ang Baguio City Prosecutor’s Office agud nga mapasakaan sang kaso ang mga military cadets kag officers nga na-angot sa kamatayon ni Philippine Military Academy (PMA) Cadet 4th Class Darwin Dormitorio sang Setyembre 18, 2019.
Sa resolution, gin-rekomenda sang panel sang mga prosecutors nga pasakaan sang kaso nga murder si PMA 3rd Class Cadets Shalimar Imperial and Felix Lumbag Jr.
Tatlo naman ka opisyal sa PMA Station Hospital nga sanday Capt. Flor Apple Apostol, Maj. Ofelia Beloy kag Lt. Colonel Ceasar Candelaria ang pasakaan man sang kaso nga murder.
Samtang si PMA Cadet Julius Tadena ang ginpasakaan sang kaso nga ‘hazing’ kag ‘less serious physical injuries’ kag magapangatubang naman sang kaso nga ‘slight physical injuries’ si 2nd Class Cadet Christian Zacarias.
Gin-dismiss naman ang kaso nga ginpasaka batuk kanday 1st Class Cadet Rey Sanopao, 3rd Class Cadet Rey David John Volante, 3rd Class Cadet John Vincent Manalo, Maj. Rex Bolo kag Capt. Jeffrey Batistiana.
Sanday Bolo kag Batistiana ang lunsay mga tactical officers sang akademya.
Suno kay Jose Adrian Bonifacio, abogado sang pamilya Dormitorio, daw kaangay nga na haw-asan ang pamilya sa development sang kaso kag ini ang labing una nga kaso nga gin-file sa idalom sang anti-hazing law.
Nahibaluan nga si Cadet 4th Class Darwin Dormitorio, 20 anyos, ang napatay sa sulod sang akademya sa diin duha ka beses na confined sa ospital kag natukiban nga may mga pilas ang iya lawas.
