ILOILO CITY – Ginhingyo ni Iloilo City Mayor Jerry Treñas ang bulig sang mga punong barangay para sa istrikto nga pagpatuman sang bag-o nga protocol para sa Locally Stranded Individual, repatriated Overseas Filipino Workers kag Authorized Person Outside Residence.
Ini ang kasunod sang pagkadismaya sang alkalde nga may mga returning residents nga wala nakasunod sa home quarantine kag ulihi na lang nakumpirma nga nagpositibo sa COVID-19.
Sa interview sang Bombo Radyo kay Treñas, iya ginpahayag nga iya na nga ginpirmahan ang Executive Order 96 ukon ang “Mandatory Protocols for Returning Residents and Authorized Persons Outside Residents coming from NCR, Cebu City and Talisay City, Cebu.”
Suno kay Treñas, indi na pag-ipaidalom sa Rapid test ang mga returning residents kag sa baylo, sila ang ipaidalom na lang sa Reverse Transcription Polymerase Chain Reaction (RT-PCR) test agud nga matumod gilayon kun sila ang positibo sa virus.
Magluwas diri, dumili-an na ang strict home quarantine kag sa baylo sa facility quarantine na lang magatinir ang mga resturning residents agud masiguro nga matapos nila ang 14 ka adlaw.
Ginpahayag ni Treñas nga iya nga ginplastar sa mga presidente sang tagsa ka Association kag Barangay Captains sa syudad ang tuhoy sa bag-o nga protocol agud nga mapahibalo man ini sa mga Punong Barangay.
Ang ginaproblemahan lang sang alkalde amo ang mga Home Owners Association sa tagsa ka private subdivision.
Sa pihak sini, ginpahayag sang natungdan nga nakadepende na sa mga barangay officials ang pagpatuman sang bag-o nga protocol kun sa diin ang mga madakpan nga wala nagasunod sa quarantine ang pasakaan gid sang nagakaigo nga kaso bangud sa pagtuga sang halit sa palibot.
