ILOILO CITY – Wala sang rason nga indi makahibalo ang mga barangay officials nga may yara sang nakapauli nga Locally Stranded Individual ukon repatriated Overseas Filipino Worker sa ila tagsa ka mga lugar.
Ini ang pahayag ni Punong Barangay Roberto Niño sang Calumpang sa distrito sang Molo kag nagaserbe nga tagpamaba sang Liga ng mga Barangay sa syudad sang Iloilo, tuhoy sa mga nakalusot nga returning residents kag nagalapas sa quarantine protocol.
Sa interview sang Bombo Radyo kay Niño, iya ginpahayag nga nagapakig-angot ang operation center sang Iloilo City Government sa Liga ng mga Barangay nga amo naman ang nagapalab-ot sang impormasyon sa barangay level.
Suno kay Niño, ang Punong Barangay ukon ang Barangay Health Emergency Response Team amo ang ginapadal-an sang impormasyon tuhoy sa returning residents rason nga sila man ang may daku nga katungdanan sa monitoring.
May kaangtanan naman sa pagpaidalom sa RT-PCR test sa 180 ka Punong Barangay sa syudad sang Iloilo, ginpahayag ni Niño nga amat-amat lang ang pagpatigayon kun sa diin ginasunod gid ang minimum health standards.
Ang nasambit nga mandu suno sa alkalde ang kabahin sang mandu sang alkalde lakip na diri ang mandatory nga pagpatigayon sang RT-PCR test sa mga returning residents.
Magluwas diri, mandatory man nga sa quarantine facility magatinir ang mga ginpaidalom sa RT-PCR test samtang wala pa nagguwa ang resulta.
May kaangtanan naman sa Locally Stranded Individual sa Brgy. Calumpang nga nagpositibo sa COVID-19, ginpahayag sang Punong Barangay nga nakuhaan na sang swab sample ang 8 ka himata sang nasambit nga pasyente.
May kaangtanan diri, nakapatigayon naman sang disinfection sa mga lugar kun sa diin posible nagpadulong ang mga naka-angkon sang close contact.
