ILOILO CITY – Ginatugyan ni Iloilo City Mayor Jerry Treñas sa National Task Force for COVID-19 ang pagdesisyon tuhoy sa repatriation sang Locally Stranded Individuals halin sa Metro Manila.
Ini matapos nga ginmandu ni National Action Plan Against COVID-19 Deputy Chief Implementer Vince Dizon nga ipaidalom anay sa RT-PCR test ang tanan nga Locally Stranded Individual antes makasakay sa eroplano ukon sa barko.
Sa interview sang Bombo Radyo kay Treñas, iya ginpahayag nga ginatahod niya ang nasambit nga desisyon apang subong nga gab-i, may duha ka barko nga nagdungka sa syudad sang Iloilo kun sa diin sakay ang mga Locally Stranded Individuals.
Ginpahayag ni Treñas nga naglab-ot sa 132 nga Locally Stranded Individual nga tumandok sang syudad sang Iloilo nga nag-abot subong nga gab-i kag buwas naman nga adlaw, Hunyo 27, may yara naman sang duha ka barko nga maga-abot kun sa diin sakay ang mga Locally Stranded Individuals nga wala pa nakapaidalom sa RT-PCR test.
Sa pagpaathag ni Treñas, naghingyo mismo si Chief Implementer Carlito Galvez Jr. nga batunon anay sang tagsa ka Local Government Unit ang mga Locally Stranded Individual nga sakay sa apat ka barko agud nga wala sang congestion sa mga pantalan.
May kaangtanan diri, ginpahayag sang natungdan nga nakahanda ang Iloilo City Government sa paghatag sang quarantine facility kag iban pa nga kinahanglanon sang mga Locally Stranded Individual.
May kaangtanan naman sa mga nagalapas sa quarantine protocol, ginpahayag sang alkalde nga desidido siya nga pasakaan sang nagakaigo nga kaso ang mga violator lakip na ang personnel sang Bureau of Fire Protection Region 6 nga nagpanglugayawan pa sa Boracay Island.
Sa pagkamatuod suno sa natungdan, ang City Legal Office na ang bahala sa pagpasaka sang kaso.
