Madamo sang mga pagpakamalaot nga nabaton ang mga mamalidha nga nagaduso nga islan ang pangalan sang Ninoy Aquino International Airport (NAIA).
Ang mga co-authored sang hagna nga islan ang NAIA sa Paliparang Pandaigdig ng Pilipinas amo sanday ACT-CIS Party-list Rep. Eric Go Yap, Marinduque Rep. Lord Allan Jay Velasco kag anak ni Presidente Rodrigo Duterte nga si Deputy Speaker Paolo Duterte sa diin ila ginpahayag nga ang pag-ilis sang pangalan sang airport ang may katuyu-an agud nga makilala ini gilayon bilang main terminal sang Pilipinas.
Suno kay Yap, tion na agud islan ang pangalan sang NAIA agud madula ang negatibo nga imahe sini.
Bangud sa ginaduso sang mga mamalidha, madamo ang nag react ilabi na ang mga Filipino bangud may yara pa sang pandemya nga ginapangatubang kag padayon sa gihapon ang pagtaas sang kaso sang COVID-19 sa Pilipinas.
Apang paathag ni Yap, prayoridad sa gihapon sang mga mamalidha ang COVID-19 response.
Bukas man si Yap sa iban pa nga mahimo ipa-pangalan sa nasambit nga airport.
