Quarantine Facility sa Lambunao, Iloilo may yara sang WiFi kag TV; Mga LSI mahimo pa nga maka request sang pagkaon

LAMBUNAO, ILOILO – Indi problema ang facility quarantine sa banwa sang Lambunao, Iloilo.

Sa interview sang Bombo Radyo kay Mayor Reynor Gonzales, iya ginpahayag nga dugang nga 36 ka mga Locally Stranded Individuals ang nag-abot sa banwa kahapon nga adlaw, Hunyo 27.

Sa 344 nga mga Locally Stranded Individuals nga nag-abot kahapon, ang Lambunao ang may pinakamadamo nga LSI nga nagpauli.

Sa ila pag-abot, may yara sang orientation nga ginhiwat para sa mga Locally Stranded Individuals sa diin ginpahibalo ang mga ini sang ila dapat kag indi dapat nga himuon.

Indi man problema ang pagkaon suno kay Mayor Gonzales bangud sa sulod sang 14 ka adlaw, may yara sang natalana nga manug luto para sa mga Locally Stranded Individuals kag mahimo pa ang mga ini nga maka-request sang luyag nila nga kaunon.

Agud indi naman matak-an ukon masubo-an ang mga LSI, may yara sang television kag wifi nga ginpahamtang sa facility quarantine.

Ang mga lihok sang banwa sang Lambunao ang pamaagi lamang ni Mayor Gonzales agud ipabatyag sa mga Locally Stranded Individuals nga “welcome” ang mga ini sa ila nga banwa.