Apat ka mga batch sang medical teams sang Department of Health Region 6 ang ipadala sa Lunes, Hunyo 29 sa Cebu City agud magbulig sa pagtapna sang Coronavirus Disease 2019 (COVID-19).
Sa interview sang Bombo Radyo kay Dr. Ma. Sophia Pulmones, pinuno sang Local Health Support Division sang Department of Health Region 6, iya ginpahayag 10 ka mga doktor kada batch ang magabulig sa Cebu apang ini ang amat-amat nga ipadala.
Suno kay Pulmones, sa tion nga matapos na ang duha ka semana nga pag augment sang una nga batch sang mga doktor, makapauli na ini sa Western Visayas kag buslan naman sang masunod nga batch.
Apang antes pa man nga dal-on sa Cebu ang mga doktor, ipa-idalom ang mga ini sa reverse transcription polymerase chain reaction (RT-PCR) test kag sa tion naman nga makabalik sa Western Visayas, liwat nga ipa-idalom ang mga ini sa RT-PCR test kag ipa-idalom man sa 14 day quarantine.
May yara man sang Personal Protective Equipment nga ipadala sa mga doktor sa diin ang eroplano nga ila sakyan ang ginpatigayon sang Office of Civil Defense Region 6.
