JANIUAY, ILOILO – Nakabatyag sang indi mapaathag nga kakulba ang iloy isa ka semana antes ginluthang-patay ang pulis nga si Police Master Sergeant Arnel Paurillo sa Brgy. Teniente Benito, Tubungan, Iloilo.
Sa interview sang Bombo Radyo kay Susana Paurillo, iloy sang biktima, iya ginpahayag nga nakatulog pa siya sa balay sang iya anak nga pulis sa banwa sang Guimbal apang bangud nga indi siya makatulog sang maayo, nagdesisyon siya nga magpauli sa banwa sang Janiuay.
Suno sa iloy nga Paurillo, nakabatyag siya sang kakulba nga indi niya mapaathag apang wala niya ginhuna-huna nga may malain na nga matabo sa iya anak.
Ginpahayag ni Paurillo nga kun wala ginpatay ang iya anak, sugaton pa siya kun tani sang biktima sa ila balay agud ipabulong sa albolaryo.
Sa subong, nagalaum na lang ang pamilya nga mahatagan sang hustisya ang kamatayon sang biktima nga natalana nga ilubong sa Hulyo 4.
