SAN MIGUEL, JORDAN, GUIMARAS-Pagpalangga kag pag-ulikid sa ila Ati Community ang nagtulod sa isa sa ati nga tapuson ang iya pagtuon agud mangin isa ka registered nurse.
Sa interview sang Bombo Radyo kay Evem Ganila, isa ka registered nurse kag cultural worker sa Kati-Kati Aeta Community sa Sitio Kati-Kati, San Miguel, Jordan Guimaras, iya ginpahayag nga sang siya ang naga- eskwela handum na niya nga mabuligan ang ila komunidad kag mahatagan ang mga ini sang giya sa importansya man sang ikaayong lawas.
Isa man sa rason nga nagtulod sa iya agud magbalik sa ila komunidad amo ang diskriminasyon nga naagyan sang iya kaangay man nga mga ati sa tion nga magpadulong sa hospital.
Suno kay Ganila, bilang isa ka registered nurse, nabuligan niya ang mga ginikanan nga magiyahan ang mga iloy sa ila lugar kun ano ka importante ang pagpa-immunize sang mga kabataan, kun ano ka importante ang prenatal check-ups lakip na ang family planning.
Subong mas nahatagan na sang masangkad nga panan-awan ang ila komunidad tuhoy sa kun ano ka importante sa adlaw-adlaw nga pagpangabuhi ang pagmentina sang ikaayong lawas agud mas mangin produktibo nga mga indibidwal.
