BUENAVISTA, GUIMARAS – Wala nakapauli sa Buenavista, Guimaras ang isa ka Locally Stranded Individual nga nagpositibo sa Coronavirus Disease 2019 (COVID-19).
Ini ang ginkumpirma mismo sa Bombo Radyo ni Buenavista Mayor Eugene Reyes.
Suno kay Reyes, yara sa Western Visayas Sanitarium sa Sta. Barbara, Iloilo ang nasambit nga pasyente kag nagapabilin nga asymptomatic.
Ginpahayag ni Reyes nga natalana nga ipaidalom sa re-testing ang pasyente kag kun magnegatibo ang resulta, mahimo na ini nga makapauli sa ila balay para sa quarantine.
Sa pagbyahe sang Locally Stranded Individual ukon repatriated Overseas Filipino Worker, ginpahayag sang alkalde nga pagasundon sang Local Government Unit sang Buenavista ang protocol.
