ILOILO CITY – Magalab-ot sa apat ka batch sang Doctors to the Barrios ang iga-assign sa Cebu may kaangtanan sa COVID-19 response sang gobyerno.
Ini ang ginkumpirma sa Bombo Radyo ni Dr. Ma. Sophia Pulmones, pinuno sang Local Health Support Division sang Department of Health Region 6.
Sa interview sang Bombo Radyo kay Pulmones, iya ginpahayag nga ang una nga batch nga ginabug-usan sang 10 ka medical experts ang magapadulong sa Cebu subong nga adlaw, Hunyo 29 kag may tatlo pa gid ka masunod nga batch.
Suno kay Pulmones, ginabanta 9-10 ka medical experts ang magabug-os sa tagsa ka batch sang Doctors to the Barrios nga igapadala sa nasambit nga lugar nga ginakabig high risk area.
Ginpahayag ni Pulmones nga ang nasambit nga mandu ang halin mismo sa tiglikom sang Department of Health kag sa National Inter-Agency Task Force.
Apisar sang kahangawa, ginpahayag sang natungdan nga ginasiguro sang gobyerno nga indi mawad-an sang medical experts ang Western Visayas.
Nahibalu-an nga ang nasambit nga lihok ang ginabalabagan naman sang Batches 36 kag 37 sang Doctors to the Barrios.
May kaangtanan diri, ginpahayag naman ni Mayor Raul Banias sang Concepcion, Iloilo nga kasubong nga nabutang sa peligro ang mga medical experts nga ipadala sa Cebu.
Suno kay Banias, santo sa kasugtanan, ang mga Doctors to the Barrios ang kinahanglan lang nga mag-duty sa lugar nga sakop sang ila area of responsibility.
May kaangtanan diri, ginpahayag ni Banias nga siya mismo ang nagpadala sang mensahe kay Department of Health Sec. Francisco Duque nga indi na mag-ideploy sa Cebu ang Doctors to the Barrios nga gin-assign sa Concepcion.
