ILOILO CITY – Ginpa-idalom sa lockdown ang St. Paul’s Hospital Iloilo bangud sa pagpositibo sang anom nila ka mga doctor sa Coronavirus Disease 2019 (COVID-19).
Sa exclusive interview sang Bombo Radyo kay Atty. Roy Villa, tagpamaba sang Regional Inter-Agency Task Force, iya ginpahayag nga matapos ang pagsinapol nga ila ginpatigayon 7:00 sang gab-i, ila na desisyonan nga i-lockdown ang nasambit nga ospital.
Suno kay Villa, ang Operation Room, Emergency Room kag Out-Patient Department ang temporaryo nga indi anay maka-operate.
Wala sang mahimo nga makasulod nga personnel ukon makabisita sa pasyente sa diin may yara sang mga ginpangbutang nga mga pulis sa guwa sang ospital.
Ang mga personnel kag mga bisita sang pasyente nga yara sa sulod sang ospital nga naabotan sang lockdown ang magapabilin sa sulod kag indi na mahimo pa nga makaguwa.
Pahayag ni Atty. Villa, ipa-idalom man sa nasal swab test bwas nga adlaw ang tanan nga mga personnel sang nasambit nga ospital agud masiguro ang ila ikaayong lawas.
I-disinfect man ang St. Paul’s Hospital sa diin mabulig mismo ang Bureau of Fire Protection (BFP).
Indi pa mapat-od ni Atty. Villa kun tubtob san-o magalawig ang lockdown.
Sa inisyal nga impormasyon nga nabaton sang natungdan, may yara sang isa ka pasyente sa St. Paul’s Hospital nga nag positibo sa rapid test apang nag negatibo sa reverse transcription polymerase chain reaction (RT-PCR) test nga mahimo nakalaton sa 6 ka mga doctor apang ang ini nga impormasyon paathag niya ang indi pa makumpirma.
