ILOILO CITY – Gintawag ni Mayor Jerry Treñas nga fake news ang nagalapta nga social media post nga ipaidalom sa lockdown ang syudad sang Iloilo kasunod sang pagsaka sang numero sang mga nagpositibo sa Coronavirus Disease 2019 (COVID-19).
Santo sa pahayag ni Treñas sa iya official Facebook page, wala sang kamatuoran nga ideklarar ang lockdown sa bug-os nga syudad sang Iloilo.
Mahimo nga ang lockdown nga ginatumod sa social media post suno kay Treñas ang gindeklarar sang Marso antes pa man ang Enhanced Community Quarantine.
Sa subong suno kay Treñas, nakaplastar na ang prorocol kag ang kalabanan nga mga pasyente nga may COVID-19 ang lunsay Locally Stranded Individuals kag repatriated Overseas Filipino Workers.
Agud nga makabulig sa gobyerno, ginpahayag sang alkalde nga likawan ang pagpalapta sang fake news agud nga indi magtuga sang kakugmat sa publiko.
Sa isa pa gid ka post, ginkumpirma man sang alkalde nga may isa ka personnel sang Public Safety and Transportation Management Office nga nagpositibo sa COVID-19.
Ang nasambit nga driver amo ang nagasugat sa mga Locally Stranded Individuals kag repatriated Overseas Filipino Workers.
Ginpasalig sang alkalde nga padayon na sa subong ang contact tracing kag nagapaidalom sa quarantine ang tanan nga PSTMO personnel tubtub nga wala pa ang resulta sang RT-PCR test.
