ILOILO CITY – Ginmandu ni Iloilo City Mayor Jerry Treñas nga bantayan sang hugot ang mga lugar kun sa diin naga-istar ang mga doktor sang Sta. Paul’s Hospital Iloilo nga nagpositibo sa Coronavirus Disease 2019 (COVID-19).
Sa interview sang Bombo Radyo kay Treñas, iya ginpahayag nga magabuligay ang elected kag appointed officials lakip na sa pagpatigayon sang hugot nga monitoring agud nga masiguro nga wala sang may makapalapit sa balay sang mga COVID-19 positive.
Suno kay Treñas, kinahanglan man nga ipaidalom sa strict home quarantine ang mga kaupod sa balay sang walo ka mga doktor agud masiguro nga wala na sang local transmission sa bulig sang Barangay Health Emergency Response Team.
Ginpahayag ni Treñas nga lima ka barangay ang yara sa syudad sang Iloilo kag isa naman ang sa probinsya sang Iloilo.
May kaangtanan diri, pila lamang sa mga barangay nga gintumod ni Liga ng mga Barangay President Irene Ong kun sa diin nagapauli ang mga doktor amo ang Oñate de Leon sa Mandurriao, Nabitasan kag Tabuc Suba sa La Paz kag Javellana sa Jaro.
May posibilidad man nga ibalik ang pagpatuman sang checkpoint sa nasambit nga mga barangay agud nga malimitahan ang nagaguwa-sulod.
Ginpasiguro naman ni Punong Barangay Roseller Paredes sang Guzman-Jesena sa Mandurriao nga ginpaidalom sa lockdown ang balay sang isa ka doktor nga nagpositibo sa COVID-19 kun sa diin natalana nga kuhaan sang swab sample ang mga naka-angkon sang close contact.
Ang problema lamang suno kay Paredes amo nga kun may yara sang baklon ang mga naga-istar sa sulod sang balay bangud nga indi sila mahimo nga makaguwa tubtub nga indi matapos ang quarantine.
Sa pihak sini, ginpahayag sang natungdan nga bilang barangay official, pangitaan niya sang paagi nga masulusyunan ang nasambit nga problema.
