Magapatigayon sang pagsinapol subong (June 30) nga adlaw ang Department of Health Region 6 kaupod ang mga Doctors to the Barrios nga ipadala sa Cebu agud magbulig sa pagtapna sang Coronavirus Disease 2019 (COVID-19).
Sa interview sang Bombo Radyo kay Atty. Jan Reuell Valaquio, abogado sang Department of Health Region 6, iya ginpahayag nga diskusyonan sa pagsinapol nga patigayunon ang tuhoy sa concerns kag iban pa nga luyag ipalab-ot sang mga Doctors to the Barrios.
Suno kay Valaquio, humalin sang nakaligad nga semana wala sila nakabaton sang official protest sa bahin sang mga doctor kundi iya lamang nahibalo-an kaina.
Sa tion nga ma diskusyonan na ang tanan nga concers, mahimo na maka-desisyon ang Department of Health Region 6 kun bala madayon pa ukon indi ang pagpadala sa mga doctor sa Cebu City.
Nahibaluan nga kahapon nga adlaw kuntani natalana ang byahe sang una nga batch sang medical team sa Cebu apang ini ang gin-suspende anay ni Iloilo Gov. Arthur Defensor Jr. kag sang DOH Region 6.
