ANTIQUE – Ginpaidalom sa lockdown ang Pedro L. Gindap Municipal Hospital sa Barbaza, Antique matapos nga nagpositibo sa Coronavirus Disease 2019 (COVID-19) ang isa ka doktor.
Sa interview sang Bombo Radyo kay Gov. Rhodora Cadiao, iya ginpahayag nga ginabanta nga yara sa 30-40 ang nalakip sa contact tracing kun sa diin ang mga medical staff kag ang mga pasyente nga yara sa nasambit nga hospital ang pagakuhaan sang swab sample.
Ang mga pasyente naman nga nakaguwa sa hospital suno kay Cadiao ang ipaidalom sa home quarantine bilang kabahin sang protocol.
Suno kay Cadiao, si Patient no. 313 – 53 anyos nga babayi ang na-admit sa hospital samtang magluwas sa nasambit nga doktor, may isa naman ka Locally Stranded Individual nga tumandok sang banwa sang Culasi nga nagpositibo sa COVID-19.
Ang Patient no. 312 – 19 anyos nga babayi ang naghalin sa Quezon City kag nakabatyag sang sore throat apang sa subong, ginpahayag sang gobernador nga yara na sa maayo nga kahimtangan ang nasambit nga Locally Stranded Individual.
