ILOILO CITY – Indi kuntento si Iloilo City Councilor Eduardo Peñaredondo sa presentation sang Presidente sang More Electric and Power Corporation kadungan sang public committee hearing nga ginpamunu-an sang Committee on Energy and Public Utility.
Kadungan sang hearing nga ginpamunu-an ni Iloilo City Counilor Rommel Duron, subong nga adlaw, Hunyo 30, gin isa-isa ni Mr. Roel Castro, Presidente sang More Power, kun ano ang mga rason kun nga-a masami nagaluntad ang malawig nga power interruption.
Lakip sa mga rason amo ang mga gubaon nga equipment kag pasilidad sang Panay Electric Company kun sa diin nagtalana sang P1.9 billion ang More Power para sa 5-year development plan.
Magluwas diri, ginpahayag ni Castro nga normal lamang ang rotational power iterruption agud nga hatagan sang ligwa ang preventive maintenance.
Sa interview sang Bombo Radyo kay Peñaredondo, iya ginpahayag nga sulit-sulit na lang ang mga rason sang More Power.
Suno kay Peñaredondo, kun tani, nagpatukod sang bag-o nga pasilidad ang More Power sa baylo nga ginsubli lang ang kagamitan sang Panay Electric Company.
Sa pagkamatuod suno kay Peñaredondo, wala gani nakahatag sa Iloilo City Council sang bisan isa ka kopya sang development plan ang More Power.
Bilang opisyal suno sa natungdan, iya nahangpan nga humalin pa sang una, masami nga nagaluntad ang power interruption bangud sa nagataas nga electricity demand sa syudad sang Iloilo kag ang nasambit nga problema ang wala nasulusyunan sang bag-o nga power distributor.
