ILOILO CITY- Gin-apinan ni Iloilo City Councilor Rommel Duron ang MORE Electric and Power Corporation batok sa Panay Electric Company may kaangtanan sa isyu sa power distribution sa syudad sang Iloilo.
COUNCILOR, ILOILO CITY
Sa interview sang Bombo Radyo kay Duron nga amo man ang Chairman sang Committee on Energy and Public Utility sa konseho matapos ang ginpatigayon nga committee hearing nga gintambungan sang duha ka kompaniya, iya ginpahayag nga dapat hatagan sang tsansa ang MORE Power.
Suno kay Duron, ginbayluhan ang power distributor bangud indi luyag sang mga pumuluyo ang nauna nga power distributor nga Panay Electric Company.
Dugang pa sang konsehal, kun ipaanggid ang duha ka kompaniya, mas mahapos pakig-angutan ang MORE Power indi kaangay sang Panay Electric Company sadto nga wala sang may nagasabat sa telepono.
Nagapati naman si Duron nga may nagakatabo gid man nga pagpangsabotahe sa power distribution sa syudad rason sang pagluntad sang sunod-sunod nga power interruptions.
Pahayag pa niya, kaangay nga dalagko nga tawo ukon grupo ang yara sa likod sang pagpangsabotahe.
