STA. BARBARA, ILOILO – Ginapahayag nga yara sa severe condition ang isa ka COVID-19 positive nga tumandok sang Sta. Barbara, Iloilo.
Ini ang ginkumpirma sa Bombo Radyo ni Mayor Rema Somo kun sa diin suno sa iya ang nasambit nga pasyente amo si Patient no. 336 – 52 anyos nga lalaki, isa ka negosyante sa banwa sang Pavia kag nalakip sa 21 ka panibag-o nga COVID-19 case as of July 2.
Sa interview sang Bombo Radyo kay Somo, iya ginpahayag nga santo sa impormasyon nga iya nabaton, wala sang travel history sa luwas sang pungsod ang nasambit nga pasyente apang indi pa makumpirma kun may yara na sang local transmission sa banwa sang Sta. Barbara.
Suno kay Somo, ginpaidalom na sa home quarantine ang pamilya sang pasyente lakip na ang kabulig sa balay kag ang mga tinawo nga nagabantay sang negosyo kun sa diin lunsay sila nagapabilin nga asymptomatic.
Ginpaidalom man sa lockdown ang balay sang pasyente lakip na ang balay sang iya kabulig kag ginkuhaan naman sang swab sample ang tanan nga naka-angkon sang close contact.
Ginapahayag nga sang Hunyo 18 sang nakabatyag sang sintomas sang COVID-19 ang pasyente kag sang Hunyo 21 ginkuhaan sang swab sample para sa RT-PCR test.
Ang nasambit nga pasyente ang na-admit sa subong sa isa ka hospital sa syudad sang Iloilo.
